అల్హందులిల్లాహ్. ప్రియులారా! సుబ్ హా నల్లాహి వబిహమ్దిహీ యొక్క ఘనతలో ఈ కొన్ని హదీసులను శ్రద్ధగా వినండి. మరియు అధికంగా ఈ యొక్క జిక్ర్ చేస్తూ ఉండే ప్రయత్నం చేయండి. అల్లాహ్ నాకు మీకు మనందరికీ ఈ యొక్క జిక్ర్ అధికంగా చేసేటటువంటి సద్భాగ్యం ప్రసాదించుగాక.

మొదటి హదీస్ షేక్ అల్బాని రహిమహుల్లాహ్ సహీహలో ప్రస్తావించారు.నూహ్ అలైహిస్సలాం మరణం సమీపించినప్పుడు తన కొడుకును దగ్గరకు పిలుచుకొని, నాన్నా నా కుమారుడా! నేను నీకు రెండు విషయాల గురించి వాంగ్మూలం (వసియత్) చేస్తున్నాను. నేను రెండు విషయాల గురించి ఆదేశిస్తున్నాను, శ్రద్ధగా వాటిని నీవు పాటించు. ఒకటి లా ఇలాహ ఇల్లల్లాహ్, దీనిపై చాలా స్థిరంగా ఉండు. ఎందుకంటే ఈ లా ఇలాహ ఇల్లల్లాహ్ యొక్క ఘనత ఎంత గొప్పదంటే మొత్తం భూమ్యాకాశాలు ఈ విశ్వమంతా కూడా ఒక రింగు మాదిరిగా చేసేస్తే లా ఇలాహ ఇల్లల్లాహ్ ఆ రింగును విరగ్గొట్టే అంతటి శక్తి గలది. మరియు అధికంగా సుబ్ హా నల్లాహి వబిహమ్దిహీ పలుకుతూ ఉండు. ఎందుకంటే ఈ లోకంలో ఉన్న ప్రతి సృష్టి యొక్క ఆరాధన అదే. దాని ద్వారానే వాటికి ఉపాధి లభిస్తుంది.

రెండవ హదీస్ సహీహ్ బుఖారీ మరియు సహీహ్ ముస్లిం లో వచ్చినది. ప్రవక్త సల్లల్లాహు అలైహి వసల్లం తెలిపారు. సుబ్ హా నల్లాహి వబిహమ్దిహీ అని ఎవరైతే ఒక రోజులో 100 సార్లు పలుకుతారో వారి పాపాలు మన్నించబడతాయి. వారి పాపాలన్నీ కూడా తుడిచివేయబడతాయి. ఒకవేళ అవి సముద్రపు నురుగంత ఉన్నా సరే.

మూడవ హదీస్ షేక్ అల్బాని రహిమహుల్లాహ్ సహీహ్ అత్ తర్గీబ్ లో ప్రస్తావించారు. ఎవరైతే సుబ్ హా నల్లాహి వబిహమ్దిహీ ఒక్కసారి పలుకుతారో వారి కొరకు స్వర్గంలో ఒక ఖర్జూరపు చెట్టు నాటబడుతుంది.

నాలుగవ హదీస్ సహీహ్ ముస్లిం షరీఫ్ లోనిది, ప్రవక్త సల్లల్లాహు అలైహి వసల్లం తెలిపారు. నిశ్చయంగా అల్లాహ్ కు అత్యంత ప్రియమైన పలుకుల్లో ఒకటి సుబ్ హా నల్లాహి వబిహమ్దిహీ.

ఐదవ హదీస్ షేక్ అల్బాని రహమహుల్లాహ్ సహీహ్ అత్ తర్గీబ్ లో ప్రస్తావించారు. ప్రవక్త సల్లల్లాహు అలైహి వసల్లం తెలిపారు: రాత్రి మేల్కొని నిలబడి అల్లాహ్ యొక్క ఆరాధన చేయడం, నమాజ్ లో తిలావత్ (ఖురాన్ పారాయణం చేయడం) చాలా కష్టతరంగా అవుతుందో, చేయలేకపోతున్నారో, అలాగే ఎవరి వద్దనైతే డబ్బు ధనము ఉండి ఖర్చు చేయలేకపోతున్నారో, పిసినారితనం వహిస్తున్నారో, లేదా శత్రువు ముందుకు వచ్చినా అతనితో పోరాడే అటువంటి శక్తి లేక పిరికితనం వహిస్తున్నాడో, ప్రత్యేకంగా ఇలాంటి వారు అధికంగా సుబ్ హా నల్లాహి వబిహమ్దిహీ అని పలుకుతూ ఉండాలి, ఎందుకంటే, ఈ సుబ్ హా నల్లాహి వబిహమ్దిహీ పలకడం వారు, బంగారపు పర్వతాలు, మరియు వెండి పర్వతాలు అల్లాహ్ మార్గంలో ఖర్చు చేయడం కంటే కూడా అల్లాహ్ కి చాలా ప్రియమైనది అల్లాహు అక్బర్.

ఆరవ హదీస్, ప్రవక్త సల్లల్లాహు అలైహి వసల్లం తో రుజువైనది, సహీహ్ ముస్లిం లోని హదీస్. ప్రవక్త సల్లల్లాహు అలైహి వసల్లం తెలిపారు. అల్లాహు తాలా తన దైవదూతల కొరకు మరియు తన యొక్క దాసుల కొరకు ఇష్టపడిన, ఎన్నుకున్న, ఛాయిస్ చేసినటువంటి పదాలలో ఒకటి చాలా ముఖ్యమైనది సుబ్ హా నల్లాహి వబిహమ్దిహీ.

అల్లాహు తాలా మనందరికీ సద్భాగ్యం ప్రసాదించుగాక!